Testament de Lucas Bouyssavin dit Boussavy

4 Decembre 1687

Au nom de Dieu soict Amen, Ajordhuy quatriesme du mois de décembre l’an mil six cens quatre Vingt et sept apres midy moy Lucas Boissavin dict Boussavy du lieu de Couze juridiction de St. Capraise en Perigord, mais puis tretze ans ma maison sise au faubourg en ville de Bergerac au dit Perigord volant toutes mes affaires en estat et bonne disposition aultant que faire possible estant en cogitation de quitter ce royaulme ou grandes miseres et perturbations me poursuivent chascungs jours despuis longtemps et encore davantage en presant moy et les miens en Dieu veult disposer de mes biens en faisant mon testament en maniere de disposition de ultime vollente a seulle fin que en cas jamais revenir vivre et morir dans ce pais oú jai pris le jour mes fraires qui voldront rester saichent mon desir et vollonte derniere comme il seroit en cas de mort et pour cela le present testement remis a Pierre Marchays de Roumas esquier tres cher amy sur teire et en Dieu le Pere le priant remecttre le dict testement a Me Nicolas D’arroman Notre a Bergerac en Perigord lequel Nicolas D’arroman voldra asseurer bonne execution en default et oultre le dict Pierre Marchays de Roumas au cas ou irait terre estrangere et hospitaliere et premier et dabord moy Lucas Boissavin dict Boussavy invoque le nom et benediction de nostre Dieu le pere dict Boussavy invoque le nom et benediction de nostre Dieu le pere et le prie de me faire misericorde et pardonner mes faultes et pesches estant pour son vrai nom et pratique de la vraie liberte et vraye religion que je quicte ce pais abondonnant a sa grace et vollonte les parts de biens de ce monde qui a pleu me grattifier quel lieu et pais mon ame sera separe de mon corps je desire que corps soict enseveply chestiennement et que dix escts sol soient donnes en souvienir de moy aux pauvres de l’esglise refformee du lieu de Bergeirac et oultre ce si mes fraires et sur Jean et Pierette restent dans ce pais et ne me suivent je veulx que ma part de biens que je laisse ce jordhuy leur viennent a savoir la mayson patus et bois advenus de nostre ancestre et grandpere commung Jacques Boissavin dict Boussavy et que se treuvent les dictes mayson patus et bois au lieu de Couse Juridtn de St Capraise pres Bergerac en Perigord et encore en quittant ce pais jabandonne touts mes biens que sage economie ma permi d achetter dans mesme lieu de Couse a scavoyr in grand patus grange et vigne adchapter par moy despuis si annees ou environ le dix du mois de septembre de l’an mil six cents quatre vint un, contrat retenu par mesme S Nicolas Darroman note royal a Bergerac en estoict encore espoir de tranquilité et quest devenu despuis grande misere. Je remets au bons offices soings et amitie de tousjours mon amy Pierre Matchays de Roumas un coffre noguier bien ferme a sarrure et se treuve dans le dict cofre nombreux papiers de famille et prie le dict Marchays ouvrir ce dict cofre quand serai en pais hospitalier en presance de mes fraires et seur cy nommes pour que scaichent par la lecture mes dernieres et ultimes veullontes et surtout scelles de nos parans ancestres commungns qui sont aussi contenus en grand estuy pau de vaiche oultre ce je desire et entens que la somme de onze cent treinte et deux livres tour dotze sols trois derniers que se treuve aussi dans une caisse avec cle et aussi dans le dict grand couffre soict partagie entre mes dicts fraires et par esgalles parts entre eulx par le dict et mesme Marchays empourtan sullement pour parti Dieu scait de quoi pourir nourrir et vivre en mon chameng et enfain faict le presant testement et acte de derniere vollente que desire estre remis encore a Me Nicolas Darroman par les soings de Pierre Marchays de Roumas pour le contenues sy estre execute par le dict Nicolas Darroman et Pierre Marchays de Roumas en ce que le concerne chascung me confiant a la grace et misericorde de Dieu pour me proteger.

Boissavin Boussavy

Nicolas dÁrroman Jh. Roumas presant.